|
大學生 - 20120701 - 蘋果日報
一位中文大學中文系碩士生，在中大以一級榮譽畢業，當然係優秀學生啦，但不知為何，竟然跳樓輕生，令人痛惜。佢嘅親人話呢位碩士生自細讀書好叻，中學年年考第一，為咗讀書，唔拍拖、唔出街、食飯時都拎住本書，係唔係自己俾自己壓力呀，抑或自己閂埋門讀書太勤力而不自覺地患上抑鬱症呢？真難以明白。左丁山教仔女一個方法，就係自小開始，叫佢地唔好考第一，不要為考入班上前十名而讀書，費事俾佢地壓力。唉，年年考第一，大學一級榮譽，到終有一日遇上不如意之事，就恐怕情緒波動咯。
另一位中大成績優異生就有好消息，大概係自中學時代已經參加編寫電腦程式比賽，有贏有輸，習慣咗面對競爭之故，呢位應屆計算機科學系畢業生得到 Facebook聘請，今年十月往矽谷返工，年薪十萬美元。美國科技公司求才若渴，連未畢業嘅電腦系學生都唔放過，僱用畢業生更加勇猛，貫徹用人唯才嘅宗旨。左丁山在本欄寫過，本地高考尖子，人人話要讀醫，讀環球商業，2000年後放棄電腦與訊息工程，甚為可惜，今個月係高考與文憑試放榜月，申請入讀大學嘅不妨考慮下讀工程與電腦科技。一位高考生讀者Ｓ來函話佢一向喜愛數學與物理，選咗 JUPAS十個有關工程的科目，電機、土木、屋宇，乜都齊，佢問左丁山應該揀邊一類。如果關於三年後職業市道，左丁山唔敢講，無人可預測將來情況，以左丁山愚見，在21世紀，長期需要科技人才，如讀工程，大可主修 Double E加電腦，副修藝術/設計，如果讀得好，可以衝出香港，投奔矽谷，本地與內地亦好需要呢類人才。
本港大學學額唔夠多，但如付得起學費，到英國入大學就好易，英國大學莫財，見錢開眼，好需要海外學生交學費（本土生九千英鎊，海外生12,650鎊），成績差啲亦照收可也，是故英國大學內嘅中國學生人數大增。無法啦，英國人係務實現實民族，國家莫財，支持不了咁多大學，咪大開方便之門，歡迎來自富國之富家子女囉！
左丁山
電腦學生好景 - 20120622 - 蘋果日報
六月七日本欄寫「矽谷利誘學生輟學」；有朋友話唔係幾相信，當今世界經濟局面不明朗，邊度有咁好景呀。左丁山話既然「華爾街日報」寫得出，應有根據，唔會好似本地一啲報導屬於老作之類嘅。
呢日市場顧問 P自美國回來，約左丁山上鏞記食飯，有燒鵝食，梗係一口應承。點菜時，顧問 P話要一隻燒鵝，侍應都嚇咗一跳，點食得晒呀？顧問 P話上次叫一碟例牌，同女兒一陣就食完，故此要叫夠一隻，最多食唔晒就打包返屋企，一定唔會浪費。哈，呢次佢帶埋公子嚟，得十八歲，咁年輕，一個人已可以食完半隻燒鵝啦！
問世姪入咗大學未？佢話去年得華盛頓大學（ UW）取錄，入讀電腦系，現在回來放暑假，好開心，明年多數唔會返港咯，會留在西雅圖做暑期工。暑期工容唔容易搵呀？世姪話：「我最初都想唔到，原來好易搵工，微軟總部設於西雅圖，還有阿瑪遜網站，最近 fb到西雅圖設分公司，電腦呢行唔夠人才，我一位師兄暑假後升三年級，還有公司聘請佢，叫佢唔駛讀到畢業㖭，搞到佢心大心細。」咁講法，即係證實「華爾街日報」報導無錯啦，讀電腦與 IT，喺美國幾易搵工。
世姪承認佢在加州讀中學，以前對華盛頓大學所知不多，後來因為想主修電腦，特登上網搵全美最佳電腦課程，先至發覺華大 UW（按：密蘇里州有一間著名私立華盛頓大學 Washington U，簡稱 WU，不可與西雅圖之 University of Washington UW混淆）嘅排名相當高，於是申請入讀，至於卡納基梅農、柏克萊呢啲，細姪話確係好難入到去嘅。
華大電腦工程有個大好處，就係西雅圖人士蓋茨未入哈佛時，常在華大電腦實驗室留連忘返，依家貴為世界首富或次富、三富，捐錢俾華大搞電腦硬件軟件，絕不手軟，大方到極，故此華大呢間州立大學雖然俾州政府削減預算削到入肉，但電腦科學嘅學生，還是感覺良好到極！問多句，世姪副修邊一科呀？佢答得好：「音樂！」呢啲就係美國式通識學生嘞！著名大教授榮鴻曾飲譽音樂界；佢嘅第一個博士學位係 MIT物理，第二個博士學位係哈佛音樂，真正叻人應該「文武兼備」嘅，耶魯大學校長 Levin係耶魯經濟系教授，但佢兩個文學士學位係史丹福與牛津（政治與哲學），主修英國文學嘅！
左丁山
|
