siu糖
(♥慈姑;!)
普通會員
UID 8033
積分 666
經驗 376
YK幣 883
帖子 365
精華
0
註冊 2008-1-7
用戶註冊天數 5963
用戶失蹤天數 4803
性別 女仔
狀態 離線
|
|
|
|
足足一個禮拜無見過阿鋒，話我唔掛住佢就假既…不過既然係自己決定既，咁難受都要自己去承受係咪？呢個禮拜我其實都訓得唔太好，可能唔習慣身邊無左個人啦，幾乎晚晚訓到半夜都扎醒，搞到我精神差晒。
呢日阿奈打黎叫我落去陪佢食飯，又好，反正係屋企都自己一個食，落去起碼叫做多個人陪下吹下水，點都唔駛咁悶先。
準時落到樓下，點知又係一個人都無，真係頂左出黎，又話會準時到。唔見人就要打電話啦，唔係又唔知要等幾耐。
（接駁鈴聲：別人都知道我火爆，直行直衝不守禮貌…）
「喂八婆，係邊呀妳？」佢一聽話我就問，對佢，基本上唔太需要禮貌。
「妳到左啦？」
「係呀…就黎悶死tim啦…」
「喔，咁妳等陣啦，而家落黎架啦我。」唉，次次都要人等。
收左線之後我就叫左杯凍奶茶，諗住飲住野先都好。就係杯奶茶黎到我面前既同時，我見到阿鋒係門口直接行緊埋黎我度。
「今日咁得閒既？」我望住佢笑，好掛住佢呀。
「無野做嘛。」佢坐低左係我對面，然後伸手叫做杯凍啡，例牌飲品。
「阿奈佢地叫你落黎食野架？」我問。
「妳認為我唔會搵妳咩？」佢無答到，笑住反問返我轉頭。
一聽佢呢句我就知係佢搵阿奈過橋黎約我既，衰得佢。阿奈又係咁，明知係阿鋒提出約我又唔出聲話我知，等我執返靚d個樣先丫嘛，幾日都訓得唔好，都唔知個樣會唔會好殘tim架？
「笑咩呀你？」見到佢個笑容好似笑緊我咁，忍唔住要問佢一句。
「坐過黎。」佢望左我一眼之後就坐左入靠牆個邊，仲拍一拍張凳示意我坐過去。
我係聽話既小朋友黎架嘛，佢叫到我一定會坐架，嘻。
一坐埋去，佢就攬住我條腰。
Um，種感覺好sweet、好正！久違了！佢一攬我，我更加覺得自己掛住佢。
「今日佢無搵你咩？」我口中既「佢」當然就係阿柔。奇怪佢今日點解唔見人，以佢個幾日既表現，應該會痴實阿鋒先岩架。
「佢去左上媽咪班…」一路講佢就一路錫落黎，係句說話完結既同時我已經同佢咀對咀啦，「今晚我上妳屋企好無？」先黎一個火辣辣既香吻，再黎一個情深款款既眼神，對唔住，我投降！佢咁既樣我點捨得話唔好呀？
「嘩！咁快就打晒茄輪啦？要搞野留返係屋企嘛，人多丫呢度！」阿奈一行入黎見到我地錫晒咁就大叫。
「人多妳又咁大聲？驚死人唔知呀？」我串返佢。
「車！你地都比人望晒啦，係人係鬼都知啦！」
「妳仲好講？等妳等到我悶死啦！」為左唔比佢繼續笑我，我梗係拉開過話題啦。
「唔等我妳邊有機會同鋒哥仔談情姐。」阿奈望住我奸笑，我頂。
「叫野食啦。」阿sam笑。
個晚阿鋒上左黎我屋企。
佢上黎當然就唔會淨係坐咁簡單啦。入到屋，沖完個涼換左件衫，佢已經急不及待抱我入房。
我覺得成晚都有種好sweet，好似岩岩係返埋一齊個種好恩愛既感覺。基本上，成晚我面上邊都掛住個最甜最甜既笑容，開心係理所當然既，因為事實證明，就算我唔係阿鋒身邊，佢仍然一樣咁愛我。
完事之後，我訓係度攬住佢同佢傾計。
哈，突然發覺我地而家既關係其實幾似偷情。雖然名義上我仲係佢女朋友，但事實我唔係成日見到佢、同佢一齊，要見既都要偷偷地見，真係陰公。但諗深入d，如果唔係咁樣既，我地都未必搵得返個種咁恩愛既感覺啦。
之所以話呢，塞翁失馬，焉知非福？
傾傾下平常野，我突然諗起決定出黎搵野做個件事，都係問下阿鋒意見比較好，如果佢反對既話我都無乜機會做得成。
「老公呀，我想出黎搵野做呀…」我點左支煙遞比佢。
「做咩無啦啦想搵野做呀？」
「咁我地而家都咁少返學囉，係屋企又悶，咪想出黎搵d野做下囉。」
「妳得唔得架？懶到死咁有無人請妳？」佢一路笑一路用手指點我鼻頭。
「我梗係得啦！邊度懶喎！」我笑住捉返佢隻手講。
「都好既，不過妳要自己小心呀。」
「嗯！我知架啦！」見到肯應承比我出去做野，我即刻就主動錫左佢塊面一啖。
「而家我唔可以成日係妳身邊陪妳，咩事都好，記得小心同埋唔好勉強呀。」
佢教過我，如果有人問起我識唔識佢既話，就要扮咩都唔知。我知佢要我咁做既原因係想保護我，你知啦，黑社會咩人都有，乜事都可以發生。加上曾經發生過阿柔件事，佢更加唔敢掉以輕心。
「你都知而家唔可以成日陪住我啦咩…」我扁嘴。我認我係呷醋架！一諗起佢同阿柔一陣個陣就妒忌，不過無法啦，鬼叫係我自己決定。
「呷醋呀？」佢笑住伸手禁我個嘴，跟住問。
我無出聲，佢呢d明知固問我係唔會答既，我個樣同句說話都已經清楚地話晒佢知啦，仲要問我咩！
「妳而家呷醋都無用架啦，又係妳自己決定要我返去佢身邊既。」佢家陣擺到明就係明串我，報返我個日決定件事個仇咁話。
比佢講多兩講，我更加唔忿氣，直頭谷埋泡腮坐係度發脾氣。
「傻妹唔好發脾氣啦，而家咁都幾好呀，小別勝新婚嘛。」佢摸下我個頭。
咁又係既，佢都講得岩…起碼而家我仲可以同佢見面，見到佢個陣大家又仲恩愛過以前，其實咁樣都算唔錯啦。
「又好，算你講得岩，我唔發脾氣啦。」我拉好張被，「覺覺豬lu！」
「咁快訓啦？不如…」佢望住我淫笑。
我當然知道佢呢個笑容代表咩啦！
「仲黎？！你得唔得呀？！」我笑住反問。
「哎呀！」佢一聽到我咁問，即刻就轉身壓左係我上面，「妳睇小我呀？妳唔得都未到我唔得呀！」
我梗係唔會睇小佢啦，同佢一齊左咁耐當我真係唔知佢咩材料咩，不過為左增加情趣，一於扮野，奸笑。
「我點知你呀？嘻，你咁虧…」我笑到嘻嘻聲。
「我虧？！」佢唔忿氣我話佢，伸手R我條腰，「我虧丫啦！虧丫啦！虧唔虧？」一路R佢就一路問。
「…哈哈！唔好…放手…！哈哈哈！唔虧啦唔虧啦！好痕呀！」我一路笑一路縮，笑到差唔多斷氣咁滯，「…哈哈哈…對唔住啦！放手啦！哈哈哈…唔虧啦，你最勁啦得未呀？…哈哈哈哈…」為左求饒，我係亂七八糟咩說話都可以講得出口既，就連平時唔會講既野都可以講。
「妳講多次最後個句？」事實證明我呢招好有效，佢一聽到就即刻停晒手。
「咩呀…？」回左氣之後我梗係諗到自己講錯野，扮唔知，咩都唔知。
「唔虧之後個句係咩呀？」佢望住我隻眼，放足250%既電力，唉，發電廠都就黎要問佢借電啦。
「…你最勁啦老公…」我投降。
唔駛問，跟住落黎係一室春光綺妮，嗯嗯，恩愛，嗯嗯，纏綿，嗯嗯，我好滿足，嗯嗯，包括性慾，大笑。
|
|
靜過高登：
