蘋果日報 - 20120214 - 隔牆有耳：《頭條新聞》復播「超人」扮阿 Yan

休播咗幾個月嘅港台王牌電視節目《頭條新聞》，今個星期六晚 7點又喺無綫復播。凡事最緊要打響頭炮，所以《頭條》節目主持同幕後工作人員就諗到頭炮惡搞人氣神劇《天與地》，第一集以一個《癲夠未》搖滾音樂會〈 Lion Rock Fest〉作為主題，「超人」林超榮大玩反串，模仿劇中女主角做阿 Yan。呢個造型正唔正，見仁見智啦；但肯定就好鬼爆，爆笑嗰隻爆。

話明玩《天與地》，梗要夾 band唱番首《年少無知》，吳志森、曾志豪同羅啟新三個主持呢次仲唱埋一份，但當然改咗原本歌詞，加入咗特首小圈子選舉、港大同浸大政治獻媚，以及丁屋僭建呢啲元素，好似「唐少多好，林鄭不好，丁屋加高不會有被告」、「如果，大學能坦白，學術所堅守價值今天發現還未老」同埋「紅酒，買兩箱請客，靠了千多個選委揣摩意願投下的一票」等等，聽落都令人發出會心微笑，貫徹嬉笑怒罵民生政經大事作風。工黨主席李卓人、十八鄉鄉事委員會主席梁褔元同浸會大學職員工會發言人杜耀明，噚日都好畀面撐場助陣㖭。

李八方

[url]http://hk.apple.nextmedia.com/template/apple/art_main.php?iss_id=20120214&sec_id=4104&art_id=16067819[/url]